4982
30 دقائق
لعمل شربات اصابع زينب، في حلة على النار، نضع خمس اكواب من السكر، كوبين ونصف من الماء، نصف كوب من العسل الأبيض أو عسل الجلوكوز، نترك الخليط بدون تقليب لحد ما يبدأ يغلي.
أول ما خليط الشربات يبدأ يغلي نقلبه بهدوء، ونضيف عليه عصير نصف ليمونة، أو ربع ملعقة صغيرة من ملح الليمون، ونتركه يغلي لمدة عشر دقائق، حتى يغلظ قوامه.
نسكب الشربات في إناء زجاجي، ونتركه يبرد تماماً، وندخله الثلاجة لمدة ساعتين او ثلاث ساعات.
لعمل عجينة صوابع زينب، في وعاء خشبي، نضع ثلاث أكواب من الدقيق العادي، كوب من السميد الناعم أو دقيق البسبوسه أو دقيق السيمولينا، ملعقة كبيرة من السكر، نصف ملعقة من الخميرة، نصف ملعقه صغيره من الملح، ملعقه صغيره ينسون مطحون او محلب للنكهه إختياري، نقلب المكونات الجافة مع بعضها كويس.
نضيف كوب الا ربع من السمنة السايحة، ونعاير الكوب الا ربع سمنة مٌجمدة وبعدين نسيحها، ونضيفها للمكونات الجافة، ونقلب المكونات كلها مع بعض، وبعدين نفرك الخليط باليدين جيداً، نفرك لحد ما الدقيق والسميد يتغلفوا بالسمنة كويس.
نضيف كوب من الماء بالتدريج ونبدأ نعجن الخليط، وعلى حسب قوام العجين ممكن نحتاج من كوب لكوب وربع ماء.
نلم العجينة ونغطيها بفوطة مبلولة لمدة خمس دقائق، وبعدين نحط العجين في قالب لتسهيل تقطيعها لقطع متساوية.
تقطيع العجينة بيكون زي الصورة، أو كما في الفيديو.
بعد تقطيع العجينة نفضل مغطينها بالفوطة ونبدأ في تشكيل صوابع زينب، بالطريقة التقليدية بإستخدام بصامة الكعك، نفرد العجينة على البصامة، ونلمها او نسحبها من فوق مرة أخرى، ونقفلها كويس جداً عشان متفكش في الزيت.
بصامة الكعك اللى بستخدمها عرضها خمسة ونص سم، عشان تقطعوا العجينة قطع تناسب البصامة.
في طاسة فيها زيت غزير، الزيت يكون حامي أو سخن، ودي تريكاية مهمة عشان العجينة متفكش في الزيت، نبدأ نقلي صوابع زينب لحد ما تاخد اللون الذهبي الغامق.
نخرج اصابع زينب من الزيت، ونحطها في الشربات البارد ولازم يكون بارد تماماً، نقلبها تقليبة في الشربات ونطلعها في مصفاه، لحد ما الشربات يتصفى.
نرجع ننزلها في الشربات كمان مرة ونديها كمان تقليبة ونخرجها نرصها في صينية وبعدين نحطها في طبق التقديم ونزينها بشوية فستق وألف هنا.
تعليق وتقييم (0)