طريقة عمل كحك العيد نادية السيد

1. في وعاء، نضع كيلو الدقيق، نضيف للدقيق نصف ملعقة صغيرة من الملح، ملعقة كبيرة ونصف من الحليب البودرة، ملعقة صغيرة ونصف من البيكنج بودر، ربع ملعقة صغيرة محلب أو رائحة الكحك.

2. في طاسة، هناخد اربع ملاعق سمنة فقط من النصف كيلو ونقدحهم على النار، وبعدين نضيف ملعقتين كبيرتين من السمسم المحمص، ونخليهم ياخدو غلوة واحدة مع السمن، يدوب السمنة تفور بس والسمسم فيها.

3. نعمل حفرة في الدقيق، ونضيف السمنة المقدوحة، وفي نفس الطاسة نضع باقي السمنة يدوب تسيح على حرارة الطاسة يعنى مش هنرفعها على النار، ونضيفها على الدقيق.

4. نقلب الدقيق مع السمنة بملعقة خشبية على الهادي، عشان السمنة سخنة مينفعش نستخدم الايد.

5. هنجيب ثلث كوب من الماء الدافي، ملعقتين كبار من السكر، ملعقة كبيرة من الخميرة، ونقلبهم مع بعض،  ونخليهم على جنب لحد ما نبس الكحك لمدة 15 دقيقة تقريباً.

6. بالأيد بقي نبس الكحك، هنفرك عجينة الكحك بالايد لمدة ربع ساعة تقريباً، وأول ما نكور قطعة من العجينة ونغرس أصبع فيها ومتشققش يبقي كدا العجينة مظبوطة.

7. يعد ما الخميرة بقت جاهزة وفارت، نضيفها للعجينة، ونلم العجينة فقط مجرد لم يعني مفيش عجن، ونعمل أختبار كمان مرة نكور حتة عجينة ونغرس صابع فيها لو شققت يبقي محتاجة سمنةر نزود ملعقة سمنة ونقلب العجينة تاني.

8. بعد نجاح أختبار العجينة، نغطيها بكيس، ونخلينها ترتاح 3 لـ 4 دقايق، ترتاح فقط لان الكحك مش بيخمر.

9. نجهز الصاجة، ونكور العجينة لكور صغيرة الواحدة وزن 30 جرام تقريباً، زي كحك المحلات، وممكن تحشوها عجوة أو ملبن أو عجمية زي ما تحبوا ونقفلها كويس، ونرصها في الصاجة.

10. ممكن نعمل أختبار مرة تانية ببصامة الكحك لكحكاية واحدة، نضغط عليها بالبصامة، لو شققت من الجنب يبقي لسه محتاجة سمنة، قبل ما نشكل كل العجينة ونكتشف أنها لسه بتشقق.

11. بإستخدام بصامة الكحك، وممكن تستخدموا شوكة أو قطاعة البيض، نضغط على كل كحكة من فوق، ضغطة خفيفة، عشان نشكلها من فوق.

12. ندخل الكحك في فرن على درجة حرارة 180 لمدة 10 لــ 15 دقيقة، أول ما ياخد لون من فوق ومن تحت، نخرجه من الفرن ونتركه يبرد تماماً، وبعدين نرش عليه السكر، وألف هنا.

مقادير كحك العيد بالكوب

• 6 أكواب ونصف لـ 7 أكواب حسب طريقه ملئ الكوب.
• 2 كوب + 2 ملعقة كبيرة سمنة.
• 1/3 كوب ماء دافى.
• 1 1/2 ملعقه كبيره حليب بودره.
• 1 1/2 ملعقه صغيره بيكنج بودر.
• 1 ملعقه كبيره خميره.
• 2 ملعقة كبيرة سكر.
• 1/2 ملعقه صغيره ملح.
• 2 ملعقة كبيرة سمسم محمص.
• ريحه الكحك - محلب - أو فانيليا (اختيارى).

نصائح الشيف نادية السيد لنجاح كحك العيد

• أول شيء دقيق حلو وسمنة حلوة يبقى كحك حلو عايزين دقيق تكون جودته كويسة جداً.
• هنحتاج كيلو من الدقيق بما يعادل سبع أكواب معيارية لو هتملو الكوب بالملعقة، و ستة ونصف أكواب معيارية لو هتملو الكوب من الكيس.
• كيلو الدقيق في الكحك بيحتاج نصف كوب من السمنة.
• يٌفضل إستخدام صاجات أو صواني ألومنيوم.