طريقة عمل السابلية بالكوب نادية السيد

1. لعمل جناش الشوكولاتة، في إناء نضع كوب وربع شوكولاتة حليب، ونضيف ليها الكريمة المغلية، وملعقة فانيلا، هغطي الشوكولاتة بالكريمة وأسيبها دقيقتين، وبعدين أقلبها بالويسك.

2. هفضل أقلب لحد ما أوصل لقوام جناش الشوكولاتة السيلكي الحريرى المطلوب، أنزل الأطراف بالاسبتيله، وأغطي الجناش بورق شفاف، والورق يكون ملاصق للجاناش، ونتركه لمده 3 ساعات حتى يتماسك في حرارة الغرفة.

   

3. لعمل عجينة السابلية، في العجان أو بمضرب البيض، نضع الزبدة، السكر البودرة المنخول، وننعم الزبدة مع السكر، بودرة الكاكاو، الدقيق، نصف ملعقة صغيرة من الملح، واللوز المطحون، أو ممكن أى نوع مكسرات مطحون زي ما تحبوا، ونخلط لمدة دقيقة لحد ما يبقى الخليط زي الرمل المبلول.

4. نضيف البيضتين، ونقلب أو نضرب لمدة دقيقة كمان، أو لحد ما العجينة تتلم، أول ما العجينة تتلم نوقف تقليب، هحط العجينة بعد ما أتلمت في ورق شفاف وأشكلها على شكل مستطيل، وأغلفها بالورق الشفاف، وأدخلها الثلاجة لمدة ساعة.

   

5. بعد ساعة، خرجت عجينة السابلية من التلاجة، قسمتها نصفين، نصف حطيته في الورق تاني ودخلته التلاجة، والنصف التاني رشيت تحته شوية دقيق وعليه شوية دقيق، وبدأت أفرده بالنشابة، نقلب العجينة ونلم الدقيق تحتها، ونكمل فرد.

6. بعد ما العجينة اتفردت كويس بسمك 2 مم، هقطعها بقطاعة البسكويت مقاس القطاعة اللى بستخدمها 17 سم، أو قطاعة الدونتس.

   

7. لازم نشيل الزوائد قبل ما نحرك البسكويت من مكانه، عشان يفضل شكله جميل وميتبهدلش.

   

8. نرض البسكويت في صينية مٌبطنة بورق زبدة، وندخلها الفرن مٌحمى مٌسبقاً، في الرف الوسطاني عل الشبكة، على درجة حرارة 175 درجة لمدة 10 لــ 12 دقيقة على حسب سمك السابلية، السمك اللى انا عملاه أخد سوا 12 دقيقة، لو قللتو السمك هيبقى عشر دقايق تقريباً.

9. أول ما البسكويت يخرج من الفرن وهو في الصينية، ندهن وشه بقطعة زبدة دهنة خفيفة، عشان نقفل مسام البسكويت من فوق ويبقى طري ومقرمش بعدين.

   

10. هنجيب جناش الشوكولاتة بعد أتماسك، ونحط الجناش في كيس حلوني، وبإستخدام قمع مدور 2 مم، أو قمع الإكلير، نحشي البسكويتة بالجناش من الناحية اللى كانت فوق.

    

11. نحط كمية كويسة من الشوكولاتة، ونحط بسكوتة تانية فوق الجاناش، ونضغطهم على بعض بلفة يمين وشمال بسيطة،  زي الصورة وزي الفيديو بردو.

    

12. نسيح ثلاث ارباع كوب شوكولاتة بيضا في حمام ماء، ونضيف لها ملعقة ونصف زيت زيتون أو زيت عادي، ونقلبهم مع بعض كويس.

13. نغمس وش البسكوتة في الكوتينج أو غطاء الشوكولاتة البيضا، بس حاولوا الغطا ميوصلش للجناش الداخلي، يعني يدون ندهن وش السابليه.

    

14. نزين السابليه بالاسبرينكس الموجودة عندك وأعملى الأشكال اللى تحبيها وأطفالك يحبوها، وألف هنا، وكل سنة وأنتم طيبين.

    

نصائح الشيف نادية السيد لنجاح السابليه

• الفانيليا مش لازم تضاف لشئ عليه كاكاو لانه بيمنع الزفاره.
• لو الكريمة مش متاحة ممكن تستخدموا نصف كوب حليب مع ملعقتين كبار زبدة.

طريقة عمل السابلية بالكيلو

• 180 جرام زبده فى حراره الغرفه.
• 100 جرام سكر بودر منخول.
• 30 جرام كوب كاكاو.
• 355 جرام دقيق.
• 45 جرام لوز مطحون.
• 2 بيضه فى حراره الغرفه.
• جناش الشوكولاته:
• 120 جرام كريمه.
• 232 جرام شوكلاته حليب.
• غطاء الشوكولاته البيضاء:
• ثلاث ارباع كوب شوكولاته بيضاء.
• ملعقه ونصف كبيره زيت اى نوع زيت.