طريقة عمل بسكويت العيد بالزبدة نادية السيد

1. بواسطة الهاند بلندر، هنعم السكر البودرة مع الزبدة، هنضيف ملعقتين السمنة، ونضرب الخليط كويس جداً لمدة 15 دقيقة لحد ما ياخد قوام الكريم شانتيه ولونه يبقي أبيض وهش.

2. نضيف البيض بالتدريج بيضة ونضربها مع الخليط كويس ونضيف البيض التانية وهكذا، نضيف ملعقتين من الفانيليا أنا مستخدمة فانيليا سايلة ونضرب تاني.

3. نضيف بودرة الكاسترد أو النشا لو بودرة الكاسترد مش موجودة عندكم، ربع ملعقة صغيرة من الملح، ونصف ملعقة صغيرة من البيكنج بودر، ربع كوب وملعقة كبيرة من الحليب، ونضرب الخليط كويس.

4. نضيف نصف كمية الدقيق ونقلب، لو لقينا عجينة البسكويت بتلزق في الأيد، هنضيف كمان كمية من الدقيق ونقلب، لو العجينة ظبطت ومش بتلزق مش هنضيف دقيق تاني، لو لسه محتاجة دقيق نضيف ونلقب لحد ما القوام يكون مظبوط، ونقلب بالراحة بس منعجنش.

5. بواسطة أقماع سليكون، وبلبة بسكوت 1D، في صينية نبدأ نشكل البسكوت، وندخل الصينية في فرن على درجة حرارة 180 درجة مٌحمى مٌسبقاً، في نصف الفرن على الشبكة لمدة 10 دقائق  أو 15 دقيقة على حسب سمك البسكوت.

6. لازم الصينية كلها تكون نفس حجم البسكويت عشان تستوي مع بعضها ومفيش بسكوت يتحرق لو سمكه صغير، يعني الصينية الواحدة تتعمل ببلبلة واحدة.

7. نخرج البسكوت بعد العشر دقايق بيكون أستوى وهش وريحته تجنن وكل سنة وأنتم طيبين.

نصائح الشيف نادية السيد لنجاح بسكويت العيد

• حاولي تختاري نوع دقيق يكون ممتاز.
• البيض يكون صابح أو طازج ولا يوجد به رائحة زفارة ويكون بدرجة حرارة الغرفة.
• الزبدة تكون طرية إلى حد ما لكن مش سايحة ولا متجمدة جداً.
• السكر البودرة يكون منخول ويٌفضل يكون جاهز.

طريقة عمل بسكوت العيد بالشوكولاتة

• نستخدم 3 أكواب من الدقيق (430 جرام) + نصف كوب بودره الكاكاو بدلاً من ثلاثة ونصف كوب دقيق.
• لعمل بسكوت الشوكولاتة؛ في طبق نضع ثلاث أكواب من الدقيق، ننخل عليهم نصف كوب من الكاكاو البودرة، ونقلبهم مع بعض جيداً.
• ثم نكمل باقي الخطوات كما ذكرناها سابقأ مع بسكوت الفانيليا.